竹笋上市之后，我首先要烧一大镬油焖笋，竹笋切滚刀块，用素油煸透，加虾子酱油、白糖焖足伊半个钟头（加葱姜、大蒜就是洋盘）。假使想味道再好眼，可以加眼晒干个河虾籽来拔鲜。盛出来之后再浇眼麻油，看上去锃亮，咸中带甜。油焖笋一上台子，其他菜——勿管大鱼大肉、虾兵蟹将，我觉着侪属于是跑龙套个。

　　有年勒四川个蜀南竹海吃全竹宴，竹笋、竹鞭、竹蛋、竹荪、竹衣咾啥，麻辣鲜香，最想念个还是江南个油焖笋。

　　每年搭家主婆到杭州南山去扫墓，之后就转到灵隐寺进香，勒庙里向吃素面，浇头里个笋忒好吃了。我一直想有机会痛痛快快个吃一大盘灵隐寺个油焖笋。最近伊拉个斋堂重新装修，面积也扩大了，假使有得素席，葛末阿拉就有口福了。.

　　有人讲素食，觉着尼姑庵里个师太亲自烧出来是最好个。戏曲理论家齐如山先生回忆，伊屋里向每年春节前侪好得到师太烧个素食，一只提篮，从里向端出四只清清爽爽个素食，勿多，意思意思。老婆呢，就以香油铜钿回报。经国师太个手烧出来个蕈xun菇菰笋，让齐如山吃得津津有味，一辈子也勿会忘记脱。

　　民间传说：北宋年间，杭州孤山广元寺旁边是密密麻麻个竹林，望过去一片青翠，寺庙里向僧人采茶吃茶，挖笋吃笋，也是门功课，但是，烧菜勿是伊拉个特长，只是加油盐白烧而已。苏东坡担任杭州刺史个辰光，搭好几个大和尚有交往，扫叶烹茶，谈诗拍曲，邪气开心，偶然晓得，就拿自家写个《食笋经》传授拨伊拉。其中有只菜叫糟烩鞭笋，就成为了和尚吃个特色菜肴，后首来从庙里传到民间，成为了杭州酒楼个名菜。

　　不过现在侬到杭州去，哪怕是楼外楼、天外天，也勿一定好吃到迭只名菜。但是勒竹笋上市个辰光可以试试春季版个，拿笋尖，焯水之后烧到熟，自然冷却之后加眼淡糟卤浸泡一个钟头，装盆之后再浇眼麻油，最好冷脱之后吃，回味甜鲜，清雅致极。

　　最清雅个勿勒酒楼，勿勒路边摊，而是勒山间竹林。农民挖出来个鲜笋，黄泥一撸，剥脱笋壳勒溪流里一冲，就地挖灶，架镬子升火，只摆油盐，烧熟之后就好吃了，味道鲜得来，像煞勒仙境呀。迭个勒南宋叫作“傍林鲜”，林洪勒《山家清供》里记了一笔。

　　春笋单独成菜，有玉树临风之美，同时又有邪气大个包容性，作为配菜伊十分友好。譬如，拿小黄鱼稍微烧一烧拆骨留肉，笋尖切碎，荠菜切末，烧一碗软糯绵长个荠菜黄鱼羹，起锅之后撒眼白胡椒粉，鲜香爽口。我每年也要烧一两趟。

　　竹笋丝炒咸菜，也可以加眼肉丝，最好是里脊肉，嫩而勿柴，小煸小炒风格，小家碧玉味道，过粥过泡饭是一只鼎呀，做面浇头也是邪气好个。

　　拿十几根黄泥竹笋（稍晏会有更加好个哺鸡笋上市），一大块五花肋条肉，一大块南风肉，也可以拿隔年个咸猪脚。一道摆勒大砂锅里，大火烧开，撇脱浮勒上头个沫沫头转小火焖，汤色清雅，情意浓稠。吃好一顿，多下来个，还好加眼百叶结再烧，赛过一场精彩大戏个谢幕。

　　有两点搭大家讲一讲，一是咸肉一定要带皮，勿好切得忒薄，至少要一只指末头迭能厚，辰光也勿好烧得忒长，烧到肉熟了但是还要有眼硬度就捞出来，等到整镬子汤烧好之后再摆进去加温，搿能介咸肉味道就特别香。两是烧腌笃鲜辰光一开始水就要加足，假使吃剩下来还有半镬子，下顿加水再烧，味道就会淡脱个。

　　呒没腌笃鲜个春天是勿完整个。廿年前头有朋友从上虞到上海来读博士，每年春天我侪要请伊到阿拉屋里来吃饭，腌笃鲜是主菜。一个浙江男人，春天吃勿到腌笃鲜，书读得再多也呒没用！

　　苏帮菜里向有道菜，就是一只金银蹄，一只鲜蹄髈搭一只咸蹄髈一道烧，味道邪气好。国家级烹饪大师徐鹤峰，去年勒苏州吴江宾馆特地为我做过一道上素腌笃鲜，用莫干山个哺鸡笋、天目山个焙熄笋（临安笋干）、虞山松树蕈、羊肚菌、素肠、面筋、黄豆芽咾啥个食材，先用尖扁笋、黄豆芽、笋头、香菇根吊汤，然后拿黄豆芽咾啥个“汤渣”捞出来，淀汤待用，另外起锅，鲜笋切滚刀块，用茶油煸香，加水发羊肚菌以及素高汤之后煨半个钟头，最后摆面筋搭素肠以及剪成段个焙熄笋，味道清雅隽永。

　　今年春天，徐鹤峰做过一道走地鸡、鸽子、咸鹅搭鲜笋家禽腌笃鲜，层次丰富，邪气有风味。大师讲：腌笃鲜是道大菜，也好看作是一种菜式，鲜个物事搭腌个物事一镬子烧，就是腌笃鲜。

　　受到启发了，我回上海之后用一只咸蹄髈、一小块诺顿火腿、一只老公鸭搭三斤春笋，用慢火煨了四个钟头，终于烧好了一锅汤色碧清，鲜香满室个腌笃鲜，大家开始吃，勿要客气噢！。

　　迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。

　　本文为澎湃号作者或机构在澎湃新闻上传并发布，仅代表该作者或机构观点，不代表澎湃新闻的观点或立场，澎湃新闻仅提供信息发布平台。申请澎湃号请用电脑访问。